رحلة "أثر خفي" بدأت!

أخباركم يا عشاق الفن والإبداع والحالمين؟ 🎨💜

أتمنى إنكم بخير، وإن أموركم ماشية تمام، وإن مشاريعكم وأفكاركم قاعدة تكبر خطوة خطوة حتى لو كان التقدم بسيط.

الفترة الأخيرة كنت أشتغل خلف الكواليس على شغلة متحمسة لها جدًا، وهي تجهيز سلسلة خفيفة عن الرسم وصناعة الويب تون، وبصراحة ودي أشارككم فيها أشياء كثيرة تعلمتها وأشياء قاعدة أتعلمها إلى الآن.

السلسلة ما راح تكون دروس رسم تقليدية وبس، قد ما إنها رحلة نمشي فيها مع بعض من البداية. من تجهيز ملفات الويب تون، وترتيب مساحة العمل، واختيار الأدوات والبرامج، إلى تفاصيل صناعة الحلقات والتحديات اللي ممكن تواجه أي شخص ناوي يبدأ قصته الخاصة.

وبما إني حاليًا أشتغل على مشروعي الجديد، فقلت ليش ما أوثق جزء من هالرحلة؟ يمكن أحد عنده قصة مؤجلة من سنوات، أو فكرة يبغى يبدأ فيها، أو حتى مجرد فضول يعرف كيف تنصنع القصص المصورة من الصفر.

إلى الآن ما زلت أجهز وأرتب للحلقات وأجرب بعض الأفكار اللي أتمنى تضيف جو لطيف وخفيف أثناء الشرح، لذلك باقي فيه شغل قبل ما تبدأ السلسلة بشكل رسمي. ✨

إذا كنت من الناس اللي تحب الرسم، أو القصص المصورة، أو عندك حلم تسوي ويب تون يوم من الأيام، فأعتقد إن السلسلة بتكون ممتعة لك.

قريب جدًا إن شاء الله أبدأ أنزل أولى الحلقات، لذلك خلكم قريبين... يمكن تكون هذي البداية اللي تخليكم تبدأون قصصكم أنتم بعد. 💜📖

أشوفكم قريبًا ✨🎨🌱